Chagueni Viongozi bora Serikali za Mitaa-RC Ndikilo

Posted on: September 19th, 2019

Mkuu wa mkoa wa Pwani Mhandisi Evarist Ndikilo amewaasa wananchi wa mkoa huo kuhakikisha kuwa wanashiriki katika uchaguzi wa Serikali za Mitaa na kuchagua viongozi bora watakaowaletea maendeleo kwenye maeneo yao.

Mhandisi Ndikilo aliyasema hayo alipokuwa akizungumza na wananchi kwenye mkutano wa hadhara Mlandizi wilayani Kibaha kwenye muendelezo wa ziara yake ya kusikiliza kero na malalamiko.

“Mkichagua viongozi wasio na sifa za uongozi uliotukuka watarudisha nyuma jitihada za maendeleo, na suala la uchaguzi ni la kila raia aliyejiandikisha, nenda kashiriki usije kulalamika kuwa viongozi waliochaguliwa sio wazuri” alisisitiza Mhandisi Ndikilo.

Akifafanua juu ya maandalizi, Mhandisi Ndikilo Alifafanua kuwa taratibu zote zimekamilika ikiwa ni pamoja na uwepo wa fedha, vifaa na uteuzi wa wasimamizi wa uchaguzi huo unaotarajiwa kufanyika Novemba 24 mwaka huu.

Aidha, Mhandisi Ndikilo ametahadharisha tabia ya baadhi ya wagombea kupenda kutoa rushwa na baadhi ya wapiga kura kupokea na akaeleza kuwa kufanya hivyo si tu kuwa ni kinyume cha sheria bali pia ni kujikosesha nafasi ya kujiletea maendeleo kwa kipindi cha miaka mitano.