Dawa sasa kuzalishwa Pwani

Posted on: April 4th, 2018

Mkoa  Pwani, umetekeleza  wito wa serikali ya awamu ya tano chini ya uongozi wa Rais John Pombe Magufuli   wa kujenga viwanda vya madawa na  vifaa tibana Vitendanishi  ambapo inatarajia kuwa na viwanda  vitatu, hali ambayo itaondoa  adha ya kuagiza madawa  kutoka nje ya nchi , na  imekemea tabia inayofanywa na baadhi ya wawekezaji ya kutoa ajira kwa watu kutoka nje ya nchi na kuwanyima  fursa hiyo wananchi wa  Pwani na Watanzania kwa ujumla

.
Akielezea masuala ya uwekezaji na ajira ,wakati wa ziara yake ya kutembelea viwanda mjini Kibaha ,Mkuu wa Mkoa wa Pwani Mhe Mhandisi Evarist Ndikilo alisema Viwanda vya madawa vitawezesha kuokoa mamilioni ya fedha yaliyokuwa yakitumika kununulia madawa kutoka nchi za nje.
Alieleza kuwa viwanda vitatu vinavyojengwa  Mkoani Pwani ni pamoja kiwanda cha Kairuki Pharmaceuticals Industry Ltd ,Zinga Pharmaceuticals ambacho kitajengwa kwa ubia na  Israel  na kipo mbioni kuanza kujengwa na kiwanda cha Bahari Pharmaceuticals .
“Tumeitikia  wito wa Rais Dk.John Magufuli ,lakini pia tangu kipindi cha nyuma tumejipanga kujenga viwanda hivyo ,kupitia ziara hii tunawathibitishia wananchi tunaunga mkono kauli ya serikali yetu”alisema Mhandisi Ndikilo.
Pia alieleza kuwa ,zipo fursa mbalimbali za uwekezaji lakini vijana na wazawa wanashindwa kukimbilia fursa hizo.
Ndikilo alisema wazazi na vijana bado hawajatambua kujipanga kukuza elimu na ujuzi wao kwa ajili ya kujipatia ajira kirahisi na alitoa rai kwa wawekezaji ,kuacha kuwanyima ajira wazawa na watanzania ambao wanaujuzi na sifa za kufanya kazi .
” Haiwezekani tunajenga viwanda vingi lakini vijana ,waTanzania  hasa kutoka Pwani hawanufaiki na ajira zinazopatikana, suala hili haikubaliki na sidhani kama Pwani ama Tanzania nzima haina wenye sifa na ujuzi unaotakiwa ,hivyo aliwataka wawekezaji hao watoe kipaumbele kwa watanzania wenye uwezo .
Ndikilo aliongeza kusema kuwa, amepokea taarifa ya ujenzi wa reli ya  Standard Gauge eneo la Soga hawatoi ajira hata ya udereva jambo ambalo analichunguza na atakapopata uhakika watachukua hatua zinazostahili.

Aidha Mh Ndikilo alionyesha masikitiko makubwa  kutokana  na taarifa kuwa  mkandarasi wa ujenzi wa kiwanda cha  Kairuki  Pharmaceutical Industry   anaagiza vifaa vya ujenzi kama  nondo  kutoka Uturuki kwa madai kuwa nondo zinazozalishwa  hapa nchini  hazina ubora.

Ndikilo alisema  kuwa vipo viwanda  vinavyozalisha nondo zenye ubora mfano kiwanda cha Kiluwa Investment kilichopo Mkoani Pwani hivyo  akawataka kuanzia sasa   wanunue nondo katika viwanda vilivyop ndani ya nchi.
Nae mkurugenzi mtaalamu wa Kairuki Pharmaceuticals Mhandisi.Valency Assenga alisema ujenzi wa mradi huo ulianza Machi 10 mwaka huu na mkandarasi ni Petra Construction Ltd Ltd na unatarajiwa kumalizika Novemba 2018.
Alielezea kuwa  kazi zote zinaendelea vizuri na  zipo katika hatua ya awali ya ujenzi  ambapo kazi hiyo inatarajiwa kugharimu jumla ya fedha za kitanzania shilingi  bilioni 3.9 kwa awamu ya kwanza.  
Mhandisi .Assenga alitaja changamoto zilizopo kuwa ni miundombinu ya barabara,mradi kusuasua kutokana na mvua zinazoendelea kunyesha na ucheleweshwaji wa uunganishwaji wa umeme.
Katika Hatua nyingine nae Mkurugenzi wa halmashauri ya Mji Kibaha, Bi Jennifer Omolo akizungumzia suala la mipango miji alisema wameanza zoezi la kupima Mji muda mrefu na wanaendelea na zoezi hilo .
Pia aliwataka watu waache kujenga na kufanya biashara kiholela bila kupangwa ,na kuwashauri waone watalaamu wa mipango miji Ofisi ya Mkurugenzi ili kupewa maelekezo ya kupata vibali vya ujenzi .