Halmashauri za Kibaha Mji, Chalinze na Mkuranga zatakiwa kuandaa mikakati ya kudhibiti maambukizi ya VVU

Posted on: December 2nd, 2020

Mkuu wa Mkoa wa Pwani Mhandisi Evarist Ndikilo amewataka viongozi wa Halmashauri za Wilaya ya mji wa Kibaha, Mkuranga na Chalize kuadaa mikakati ya kudhibiti maambukizi mapya ya Virusi va ugonjwa wa Ukimwi.

Ndikilo alisema Halmashauri hizo zimeeleza kuongoza kwa maambukizi mapya ya VVU huku chanzo kikielezwa kuwa ni muingiliano wa shughuli za kiuchumi,

Alisema takwimu za maambukizi kwa Mkoa huo za mwaka 2012 ni asilimia 5.9 na kwamba kimeahuka hadi kufikia asilimia 5.5 kwa mwaka 2017.

Alisema pamoja na kushuka kwa maambukizi lakini bado Halmashauri hizo zinaonekana kuwa na maambukizi mengi sababu sikielezwa kuwa biashara, Viwanda vingi na vituo vya magari makubwa.

Hata hivyo maambukizi kwa wanawake kuanzia mwezi Januari hadi Novemba mwaka huu yanaelezwa kufikia asilimia 4.3 huku wanaume wakiwa ni asilimia 3.6.

" Pamoja na takwimu hizi suala la upimaji wa hiari idadi kubwa ya wanaopomwa wanaelezwa kuwa ni wanawake ukilinganisha na wanaume, wanaume wanaonekana kuwa waoga" alisema Ndikilo.

Ndikilo alisema moja ya vikwazo vinavyoelezwa kuchochea maambukizi mapya ni pamoja na mila potofu, ndoa za utotoni na ngoma za usiku.

Katibu Tawala Mkoa wa Pwani Delphine Magere aliwataka wanawake kuwa wakwanza kupinga maambukizi mapya kutokana na umuhimu wao kwenye majukumu ya kifamilia.

Akisoma risala ya Watu wanaoishi na VVU mmoja wa wawakilishi watu hao Elizabeth Hassan alisema kikwazo kilichopo katika kundi hilo ni baadhi ya Watu wanaoishi na VVU kusitisha kutumia dawa za kurefusha maisha.