MKUU WA MKOA WA PWANI AUNDA KAMATI MAALUM YA KUCHUNGUZA TATIZO LA UTORO.

Posted on: May 12th, 2017

Mkuu wa Mkoa wa Pwani Mhe. Mhandisi Evarist W. Ndikilo ameunda kamati maalum ya kuchunguza tatizo la ongezeko la utoro kwa wanafunzi katika shule za msingi na sekondari katika Mkoa wa Pwani.

Kauli hiyo aliitoa wakati wa kilele cha maadhimisho ya juma la Elimu Mkoa wa Pwani lililofanyika Wilayani Mkuranga. Mhe. Ndikilo alisema kuwa  amelazimika kuunda kamati hiyo baada ya tatizo la utoro kwa wanafunzi wa shule za msingi na sekondari kuzidi kuongezeka kwa kasi kubwa hasa kuanzia mwaka uliopita.

Aidha alisema kuwa kamati hiyo ambayo imeanza kufanya kazi tarehe 09/05/2017 imepewa jukumu kubwa la kuchunguza kwa kina sababu zinazopelekea wanafunzi kutohudhuria shuleni wakati serikali imeondoa michango yote katika sekta ya Elimu pamoja na shughuli wanazofanya wanafunzi hao ili wasije wakawa wanakatishwa masomo na kwenda kujiunga na makundi ya uhalifu.

Pia amekemea tabia ya baadhi ya wazazi ambao wanakwamisha jitihada za Serikali kuinua kiwango cha Elimu na ufaulu kwa kuwashawishi watoto wao kuandika majibu ya uongo wakati wa darasa la saba ili wasifaulu. Kwa mujibu wa Mkuu  wa Mkoa, katika kipindi cha miaka miwili zaidi ya wanafunzi elfu mbili ni watoro shuleni na wengine wamekatisha kabisa masomo.

Kwa upande wake Afisa Elimu wa Mkoa wa Pwani Bi. Germana  Mng’aho amesema licha ya kuwepo kwa changamoto ya utoro  wa rejareja kwa wanafunzi na Sekondari bado sekta ya Elimu katika Mkoa wa Pwani inakabiliwa na changamoto kubwa ya uchakavu wa miundombinu pamoja na uhaba wa vyumba vya madarasa jambo ambalo linasababisha baadhi ya wanafunzi kusomea nje chini ya miti.