Ndikilo atilia Shaka Ujenzi wa Jengo la Ofisi za TRA Pwani

Posted on: August 28th, 2018

Mkuu wa Mkoa wa Pwani Mh. Mhandisi Evarist Ndikilo ametilia shaka ujenzi wa jengo la Mamlaka ya mapato Tanzania  TRA Mkoa wa Pwani kwa kile alichoeleza kuwa  muonekano wa jengo hilo hauendani na thamani iliyotajwa ambayo ni shilingi bilioni  2.6.

Pia ameviagiza vyombo vya ulinzi na usalama Mkoa wa  Pwani kulifanyia uchunguzi suala hilo ili kuweza kubaini kama kuna ubadhilifu wowote   uliofanyika wa fedha za  Serikali.

Hayo yamebainika leo  wakati wa Ziara yake ya  ukaguzi wa majengo yaliyojengwa katika kitovu cha Halmashauri ya Mji Kibaha,ambapo alitembelea  jengo la CRDB, Jengo la Uhamiaji Mkoa pamoja na Jengo la Mamlaka ya Mapato Tanzania (TRA).

Mhandisi Ndikilo alisema kuwa haridhishwi na kasi ya ujenzi  wa jengo la Mamlaka ya Mapato nchini (TRA)  ambalo ilielezwa kuwa ujenzi wake ulianza  mwaka 2015 ambapo hadi sasa bado halijakamilika huku tayari mkandarasi wa jengo hilo  ameshalipwa asilimia 61 ya fedha za ujenzi wa jengo hilo.

Akitoa taarifa ya ujenzi  wa jengo hilo kwa niaba ya Mkurugenzi , Meneja wa Mamlaka ya mapato Tanzania (TRA) Mkoa wa Pwani bi Euvansia Lwiwa alisema Ujenzi wa Jengo hilo ulianza April 2015 na lilitakiwa kumalizika may 2016. Bi Euvansia alieleza kuwa  ujenzi wa jengo hilo unatarajia kugharimu  shilingi 2,693,402,120.60 pamoja na VAT  ambapo  mkandarasi wa jengo hilo Humphrey Construction ltd ameshalipwa takribani Shilingi  1,653,267,510.00 pamoja na VAT.

Mamlaka ya mapato Tanzania (TRA) ni moja ya Tasisi ya Serikali ambayo ilipewa eneo la kujenga  Ofisi katika eneo la kitovu cha mji cha Halmashauri ya Mji Kibaha ambapo mpaka sasa ujenzi wake haujakamilika.

Katika Hatua nyingine Mhandisi Ndikilo amezipongeza taasisi za Uhamiaji, Benki ya CRDB na NMB kwa kuweza kutekeleza Agizo la  Waziri Mkuu kwa asilimia mia moja. Ikumbukwe kuwa Mhe.Waziri Mkuu alitoa agizo kwa taasisi zote zilizopewa viwanja katika kitovu cha Mji Kibaha kukamilisha ujenzi huo kwa wakati.Mhe. Waziri Mkuu alitoa agizo hilo alipokuwa akifungua jengo la Mahakama ya Hakimu Mkazi Mkoa wa Pwani Septemba, 2016.