Pwani yapanga Mikakati ya Kupambana na Corona

Posted on: March 20th, 2020

Mkuu wa Mkoa wa Pwani  Mhandisi Evarist Ndikilo, amesema kuwa  Mkoa wa Pwani umeunda   kamati mbalimbali kwa ajili ya tahadhari dhidi ya Virusi vya Corona katika Halmashauri zote tisa.

Hayo amebainisha  wakati akifungua kikao Maalumu cha dharura Cha Afya ya msingi, kilichofanyika machi 20, kikiwa na lengo la kuweka mikakati ikiwa atapatikana mgonjwa wa Corona kwa Mkoa hapa

Mhandisi Ndikilo alisema, kamati hizo zitakuwa na majukumu ya Kupambana na kudhibiti ugonjwa huo katika nyanja zote.

Aidha alisema kuwa  katika Mkoa huo watu wanne walishukiwa kuwa na virusi vya ugonjwa huo , ambao walipochukuliwa sampuli majibu yote yalionyesha hawana maambukizi.

Mhandisi  Ndikilo alisema, wananchi wakaendelea kuchukua tahadhari ya kujikinga na ugonjwa huo kwa kufuata miongozo mbalimbali inayotolewa na idara ya Afya ba Serikali kwenye maeneo yote.

" Sisi kama Mkoa tutasimamia maagizo yanayotolewa, ili kuhakikisha kuwa jamii yetu ya Mkoa wa Pwani inaendelea kuwa salama na bila kuwa na ugonjwa huu" alisema Mhandisi Ndikilo.

Katika Hatua nyingine Mhandisi Ndikilo kwa viongozi wa ngazi zote kuhakikisha kuwa mipango kwa ajili ya Kupambana kudhibiti ugonjwa huo iliyoandaliwa inatekelezwa kikamilifu.

Wakati huo huo  alitoa agizo kwa mamlaka ya maji safi na maji taka (DAWASA) kuhakikisha maji hayakatiki ili wananchi watumie kunawa mikono Mara kwa Mara kwa kutumia sabuni.

Nae Mganga mkuu wa Mkoa wa Pwani Dkt Gunini Kamba alisema kuwa  kuhusiana na vitakasa mikono , wananchi watatangaziwa sehemu ya kuzipata kwa gharama nafuu, na kwasasa utaratibu unaendelea kwa kuwasiliana na bohari ya madawati kufungua duka litakalopunguza adha ya kupatikana dawa hizo.

Mwenyekiti wa wafanyabiashara wadogowadogo (Machinga) Philemon Maliga aliomba elimu zaidi itolewe kwa kundi hilo ambalo linazunguka katika minada mbalimbali ya biashara.