RAS Mchatta awataka watumishi kuwa Waadilifu

Posted on: January 1st, 2024

Katibu Tawala Mkoa wa Pwani, Rashid Mchatta ametoa rai kwa watumishi wa Ofisi ya Mkuu wa Mkoa huo, kufanya kazi kwa uadilifu pamoja na kuzingatia sheria na taratibu za utumishi wa umma ili kuleta tija ndani ya jamii.

Aidha amewasisitiza watumishi hao kufanya kazi kwa ushirikiano na kuacha malumbano maeneo ya kazi.

Rai hiyo ameitoa wakati akifungua kikao cha Baraza la Wafanyakazi la Ofisi ya Mkuu wa Mkoa wa Pwani ,kilichofanyika katika ukumbi wa mikutano wa Platinum ,Destiny hall mjini Kibaha.

Mchatta amesema , ili nchi iweze kuwa na maendeleo na kutawaliwa vizuri inapasa watumishi wa umma kufanya kazi kwa uadilifu na weledi ili kuleta maendeleo kwa wananchi .

Katika hatua nyingine, Machatta amempongeza Katibu Tawala Wilaya ya Bagamoyo kwa kuwapeleka watumishi wake mafunzoni na kuwataka Makatibu Tawala wa Wilaya kuiga mfano huo.

Baraza hilo la watumishi lilipitia na kujadili taarifa ya utekelezaji wa mpango wa bajeti ya mwaka 2022/23 na 2023/24.