RAS Pwani asisitiza Uwajibikaji , Uadilifu kwa Watumishi

Posted on: November 18th, 2025

Katibu Tawala Mkoa wa Pwani Pili Mnyema amesisitiza umuhimu wa watumishi kuwajibika kwa kufanya kazi kwa uadilifu, kuzingatia kanuni, taratibu, sheria na miongozo ya utumishi wa Umma.

Mnyema ametoa msisitizo huo leo Novemba 18, 2025 wakati akizungumza na watumishi wa Halmashauri ya Chalinze ikiwa ni muendelezo wa ziara yake ya kuzitembelea Halmashauri zote za Mkoa huo inayohusisha pia ukaguzi wa miradi ya maendeleo.

"Uadilifu ni pamoja na kuwa mnyenyekevu, kuepuka rushwa, ubadhirifu na kutosababisha maumivu kwa watumishi mwenzako," alisema.

Pia amesisitiza watumishi kuzingatia ushirikiano, upendo, kuhakikisha wanatoa huduma  bora kwa wananchi.

"Kama watumishi wa Umma tunawajibu mkubwa wa kuweka  malengo halisi ambayo yatakidhi matarajio ya Wananchi na si kuwa miungu watu" aliongezea.

Alisistiza pia kuhusu uzingatiaji matumizi ya mifumo ya Serikali ukiwa ule mfumo wa upimaji wa utendaji kwa watumishi PEPMIS.

"Tunafahamu kuwa Dunia inakwenda kasi sna kulingana na Teknolojia na Serikali imeanza kutumia mifumo hiyo hivyo tunapaswa kwenda sambamba na mifumo hiyo" alisema

Katika ziara hiyo, Mnyema alipata fursa ya kutembelea  na kukagua miradi ambayo ni  mradi wa Ujenzi  na uendelezaji wa miundombinu ya Hospitali ya Msoga pamoja na Mradi wa vyumba vya Biashara (fremu) katika kituo cha mabasi cha chalinze.