RAS Pwani Yaibuka na Ushindi Mbio za Mita 200 na 400 mashindano SHIMIWI

Posted on: September 30th, 2024

Ofisi ya Mkoa wa Pwani imeibuka na ushindi baada ya kufika fainali za mbio za mita 200 na mita 400 katika Mashindano ya Shirikisho la Michezo ya Wizara na Idara za Serikali (SHIMIWI), yanayoendelea Mkoani Morogoro.

Katika mashindano hayo, watumishi wa ofisi hiyo, Benjamin Mavula na Merisiana Ntimbi, wameibuka washindi. Benjamin Magilla alishika nafasi ya tatu kwenye mbio za mita 200, huku Emerisiana Ntimbi akishika nafasi ya tatu kwenye mbio za mita 400.

Akizungumza baada ya ushindi huo, Benjamin Magilla alisema kuwa jitihada zao binafsi pamoja na maandalizi ya awali waliyofanya, pamoja na hamasa ya viongozi wao, vilichangia kufanikisha ushindi huo.

"Jitihada binafsi, maandalizi makini, na morali kutoka kwa viongozi wetu ndizo zilizotuwezesha kufikia mafanikio haya," alisema Benjamin.

Aidha, alisisitiza umuhimu wa michezo kupewa kipaumbele na viongozi katika hatua za maandalizi, huku akiwataka washiriki kujituma zaidi wanapokuwa kwenye mazoezi ili kuongeza nguvu, kwani mashindano haya yanakuwa na ushindani mkubwa.

Watumishi wengine wa Ofisi ya Mkoa wa Pwani walioshiriki na kufika hatua ya nusu fainali ni pamoja na Ginesa Mganga, Casto Ngomawangi.

Mashindano haya, mbali na kuwaunganisha watumishi, yanasaidia pia kuimarisha mshikamano na kujenga afya, ambayo ni msingi wa utendaji bora na ufanisi katika kazi.