RC Ndikilo awaasa wenye Viwanda kuhakikisha bidhaa wanazozalisha zinakidhi Vipimo ili kumlinda Mtumiaji

Posted on: June 12th, 2019

Serikali Mkoani Pwani ,imewaasa wenye viwanda kuhakikisha wanazalisha bidhaa zinazokidhi matakwa ya kisheria ya vipimo, ili kumlinda mteja,uchumi wa nchi na kupata tozo stahiki.

Aidha amezitaka ,mamlaka za maji nchini  kupeleka mita za maji kupima kwa wakala wa vipimo ili kuondoa malalamiko mbalimbali ikiwemo ubovu wa mita ama matumizi ya maji yasiyoendana na malipo .

Rai hiyo imetolewa na Mkuu wa  Mkoa wa Pwani Mhandisi Evarist Ndikilo  wakati alipotembelea mitambo ya kituo cha upimaji wa Vipimo huko Misugusugu  wilayani Kibaha.

“Napenda kutoa rai yangu kwa mammlaka zote za maji nchini wapeleke mita zao kwa wakala wa vipimo ili ziweze kupimwa na pia nawataka wamiliki wa Viwanda kuhakikisha bidhaa  wanazozalisha ziwe na vipimo sahihi  kulingana na fedha halisi" alisema Mhandisi Ndikilo

Katika hatua nyingine nae  ofisa mtendaji mkuu wa wakala wa vipimo ,Dkt Ludovick Manege amesema kituo hicho kinalenga kupima vimimina vya petrol,dizel na mita za maji.

Manege amebainisha , kwasasa wameunda kikosi maalum kwenda kukagua bidhaa viwandani kuangalia kama zinakidhi matakwa ya kisheria ya vipimo.