RC Ndikilo awataka Wahandisi wote wa Halmashauri za Mkoa wa Pwani kusimamia Vizuri Miradi ya Ujenzi

Posted on: February 8th, 2019

Mkoa wa  Pwani  umepokea  jumla  ya  shilingi  Bilioni 4.5 kwa ajili ya  Ujenzi wa Hospitali  za  Wilaya  katika  Halmashauri za  Kibaha Mji, Halmashauri  ya  Wilaya  ya  Kibaha  na  Kibiti, ambapo  kila halmashauri  imepatiwa  shilingi  billioni  1.5  kwa ajili ya  ujenzi  wa  hospitali hizo.

Akizungumza wakati  alipotembelea  ujenzi wa Hospitali  ya  Halmashauri  ya  Mji  Kibaha, Lulanzi  Kata ya  Picha ya  Ndege , kwenye  ziara yake  inayoendelea  ya  ukaguzi  wa  Miradi  ya   Maendeleo. Mhe. Mkuu wa Mkoa  wa Pwani Mhandisi  Evarist Ndikilo  alisema  kukamilika kwa Hospitali  hizo  kutaondoa  kero  ya  kutembea  umbali  mrefu kufuata matibabu.

Kila  hospitali  inatarajiwa  kugharimu billioni  1.5 matarajio  yetu  ni  kuona  ujenzi  unakamilika  kwa  muda  uliopangwa  na  sio  kuanza  mradi  na kisha    kusuasua  “alisema  Mhandisi Ndikilo.

Aidha, alisema  kuwa fedha  zote  zinazoelekezwa  katika  miradi hiyo muhimu  zitumike  kwa  wakati  na matumizi  yaliyopangwa.

Aidha, Mhandisi Ndikilo  aliwaasa Wahandisi wa Halmashauri ya Mji Kibaha na   Serikali  ya  Mkoa  huo  kujiwekea  utaratibu wa kutoka  Maofisini  kwenda  kutembelea  mradi  bila   kusubiri ziara za  Viongozi ndio  watembelee.

Katika hatua nyingine  Mhandisi Ndikilo aliwataka  wataalam wa mazingira  wa Halmashauri  ya Mji kibaha  kupanda miti  katika hospitali  hiyo  ili  kuweka  mazingira  mazuri  katika maeneo ya  hospitali  hiyo.

Naye Mkuu wa Wilaya ya Kibaha Mhe. Assumpter Mshama kwa upande wake  alitoa  rai  kwa jamii kushirikiana  na  Serikali  katika  kutatua changamoto  zinazoikabili  Sekta  ya  elimu  na  kujitolea  kwenye  miradi  ya  maendeleo.

Pia  Diwani  wa Kata ya  Picha  ya  Ndege Robert Machumbe  alieleza  kuwa, nia  ya  Serikali  ni kuwaletea  wananchi  mabadiliko  chanya  ya kimaendeleo na  amefafanua  kwamba  eneo hilo  itakapojengwa  hospitali  hiyo ya Wilaya  lina  ukubwa wa kekari  25.