RCKunenge aongoza Mkutano wa Tume ya Rais ya Maboresho ya Kodi

Posted on: January 29th, 2025

Mkuu wa Mkoa wa Pwani, Mhe. Abubakar Kunenge, leo ameongoza Mkutano wa Tume ya Rais ya Maboresho ya Kodi uliofanyika katika ofisi zake.

Mkutano huo ulihudhuriwa na Mwenyekiti wa Tume hiyo, Balozi Maimuna Tarishi, pamoja na Mjumbe wa Tume, Profesa Florens Luoga. Lengo kuu la mkutano lilikuwa kukusanya maoni, changamoto, kero, na mapendekezo kutoka kwa wadau mbalimbali ili kusaidia kuboresha mfumo na muundo wa kodi nchini.

Akizungumza katika mkutano huo, Mhe. Kunenge alimshukuru Rais wa Jamhuri ya Muungano wa Tanzania, Dkt. Samia Suluhu Hassan, kwa kutambua umuhimu wa maboresho ya kodi na kuunda Tume hiyo. Alisema kuwa lengo ni kuweka mazingira wezeshi kwa wawekezaji, wafanyabiashara, na wananchi kwa ujumla.

Niwaombe washiriki kutumia fursa hii kutoa maoni yatakayosaidia kuboresha mfumo wa kodi. Hii itatusaidia kufanya shughuli za kibiashara kwa urahisi zaidi,” alisema Mhe. Kunenge.

Kwa upande wake, Mwenyekiti wa Tume, Balozi Maimuna Tarishi, aliipongeza Mkoa wa Pwani kwa kufanya vizuri katika ukusanyaji wa kodi ukilinganisha na mikoa mingine. Alisema kuwa mafanikio hayo ndiyo yaliyosukuma Tume kuja kujionea namna wadau wanavyoshiriki katika masuala ya kodi.

Mkoa wa Pwani unachangia pakubwa katika ulipaji wa kodi, hali iliyotufanya tuje kushiriki mkutano huu na kujifunza zaidi kutoka kwa wadau,” alisema Balozi Tarishi. Alisisitiza umuhimu wa kutoa mapendekezo yatakayochangia kukuza uchumi wa nchi.

Naye Mwenyekiti wa Wafanyabiashara wa Mkoa wa Pwani, Abdallah Ndauka, alishauri kuwepo kwa sera na sheria zitakazolinda mitaji ya wafanyabiashara na wawekezaji.

Washiriki mbalimbali wa mkutano huo walipendekeza kuimarishwa kwa elimu ya mlipakodi kwa wananchi. Aidha, walihimiza Serikali kuangalia uwezekano wa kuanzisha somo maalum la masuala ya kodi kuanzia shule za msingi ili kuongeza uelewa wa wananchi kuhusu umuhimu wa kulipa kodi.