Taarifa ya TANROAD Pwani yawakuna wajumbe Bodi ya Barabara

Posted on: March 7th, 2024

Wakala wa barabara Tanzania TANROADS mkoani Pwani imeandaa na kuwasilisha makisio ya bajeti ya mwaka wa fedha 2024/2025 inayofikia Sh. Bilioni 18.9 kwa ajili ya matengenezo ya barabara na Sh. bilioni 19.4 Kwa ajili ya maendeleo.

Akitoa taarifa ya utekelezaji ya matengenezo ya barabara za Mkoa na barabara kuu kwa kipindi cha nusu ya kwanza ya mwaka wa fedha 2023/2024 kwenye kikao cha Bodi ya Barabara Mkoa wa Pwani kilichoketi Machi 7, 2024 kwenye ukumbi wa ofisi za mkuu wa mkoa wa Pwani - Kibaha, Meneja wa TANROADS mkoa huo Baraka Mwambage ametaja miradi 18 ya kimkakati inayotekelezwa Mkoani humo ikiwemo ujenzi wa barabara ya mwendo wa haraka (Expressway) yenye Kilomita 220 inayoanzia Kibaha -Chalinze, Daraja la Wami, barabara ya TAMCO - Vikawe (Kilomita 23) na Makurunge -Saadan- Tanga.

Mingine ni Kibiti - Mloka iliyopo Wilayani Kibiti (Kilomita 100.8), Utete - Nyamwage Wilayani Rufiji (Kilomita 33.7), Kibaha - Kisarawe (Kilomita19.8), Maneromango - Vikumburu - Mloka na kuelekea katika mradi wa kufua umeme wa bwawa la Mwalimu Nyerere (kilomita 198.71) na Makofia - Mlandizi - Maneromango (kilomita 100).

Kufuatia taarifa hiyo, wajumbe wa kikao hicho kwa pamoja wametoa kauli ya kuridhishwa na utendaji kazi wa Meneja TANROADS Mkoa wa Pwani Baraka Mwambage wakisema amekuwa msimamizi mzuri wa miradi ya barabara inayotekelezwa Mkoani humo.

Akizungumza katika kikao hicho, Mbunge wa Jimbo la Kibiti Twaha Mpembenwe amesema kuwa mhandisi Mwambage amekuwa na ushirikiano mkubwa na hata kutoa ushauri ambao kwa namna moja au nyingine umeleta mafanikio katika Jimbo lake.

Mpembenwe amesema kww sasa anajivunia kuwa na meneja huyo kwani miradi mingi inatekelezeka na sasa Kibiti inafunguka kimaendeleo kwakuwa barabara zinapitika muda wote na wananchi wanaendelea kufanya shughuli zao vizuri.

"Kiukweli meneja huyu lazima tumpongeze kwani anafanyakazi nzuri na amekuwa na ushirikiano mkubwa na mara nyingi amekuwa akitoa ushauri kuhusu fedha zinazotengwa za ujenzi wa barabara kuwa tuzipeleke babaraba fulani huku akitoa sababu ya kwanini fedha hizo zipelekwe huko," amesema Mpembenwe.

Mpembenwe ameongeza kuwa kwa ushauri wa Meneja wa TANROADS na wa TARURA umekuwa ukichochea maendeleo ya Jimbo la Kibiti.

Kwa upande wake Mbunge wa viti maalum Subira Mgallu amesema kuwa kazi inayofanywa na meneja wa TANROADS Mkoa wa Pwani na meneja wa TARURA Eng. Leopold Runji ni kubwa na inaleta heshima kwa Mkoa wa Pwani.

"Mimi naungana na wenzangu waliotangulia kuchangia katika kikao hiki kiukweli huyu meneja wa TANROADS Mkoa pamoja na meneja wa TARURA wanafanya kazi kubwa na nzuri na sasa hivi tunaona mabadiliko ya barabara ndani ya Mkoa wetu," amesema Mgallu.

Mwenyekiti wa Halmashauri ya Wilaya ya Kibaha Vijijini Erasto Makala ameunga mkono kauli ya wajumbe wenzake huku akisema barabara nyingi kwasasa zinapitika kutokana na juhudi za meneja wa TANROADS na TARURA.

Makala amesema zipo changamoto ndogondogo za madaraja lakini hata hivyo zinafanyiwa kazi na kwamba matumaini yake baada ya kipindi kifupi Kibaha Vijijini itakuwa na barabara zinazopitika wakati wote.

Katika kikao hicho, Katibu wa Chama Cha Mapinduzi (CCM) Mkoa wa Pwani Benard Ghaty amesema kuwa mameneja wamekuwa na ushirikiano mzuri ndio maana chama kinawasaidia kuwasemea pale pesa zinapokosekana za utekelezaji wa miradi husika na akatoa wito kwao kuhakikisha wanazisimamia vizuri fedha zinazokuja kwa ajili ya utekelezaji wa miradi mbalimbali ya barabara kwani wakifanya vizuri watakuwa wameleta heshima kwa chama na kwa Rais Dkt.Samia Suluhu Hassan anayepigania maendeleo ya Taifa.

Mkuu wa Mkoa wa Pwani Abubakari Kunenge amesema kuwa chama kuipongeza Serikali ni heshima kubwa na kwamba amekishukuru chama kwa msaada wanaotoa na wao wapo tayari kufanya yale yanayokusudiwa kwa heshima ya Rais Samia na Taifa kwa ujumla.

"Sisi wasaidizi wa Rais lazima tuhakikishe tunafanya yale yaliyokusudiwa hasa katika kusimamia utekelezaji wa miradi ya maendeleo na kuwatumikia Wananchi kwa kutatua kero mbalimbali na tukifanya hivyo tutakuwa tumemtendea haki Rais wetu,"amesema Kunenge.Sent from my iPhone