TAWA yatoa misaada ya kibinadamu kwa waathirika wa mafuriko Kibiti na Rufiji:RC Kunenge

Posted on: April 16th, 2024

Mkuu wa Mkoa wa Pwani ,Abubakar Kunenge amepokea misaada ikiwemo unga tani 6.4, maharage kilo 666, magodoro 186 vyenye thamani ya 20mil kutoka Mamlaka ya Usimamizi wa Wanyama Pori Tanzania (TAWA) .

Akikabidhi msaada huo kwa niaba ya Kamishna wa Uhifadhi (TAWA), Kamishna Msaidizi Mwandamizi wa Mamlaka ya Usimamizi Wanyamapori Tanzania (TAWA) Kanda ya Kusini Mashariki SACC ,Abraham Jullu, ametoa pole kwa wananchi wa Rufiji na Kibiti .

Ameeleza, licha ya msaada wa chakula na magodoro mamlaka hiyo imetoa boti moja kwa ajili ya kuongeza msaada kwa vyombo vya uokoaji na kuwa wameendelea kutoa elimu kwa wananchi juu ya tahadhari ya wanyama ( mamba na viboko) ambapo hadi kufikia aprili 15,2024 wametoa elimu kwa wananchi 4,226 katika kata nne wilayani Rufiji.

Nae Mkuu wa Mkoa wa Pwani Kunenge ametoa shukrani kwa Rais wa Jamhuri ya Muungano wa Tanzania kupitia Mamlaka hiyo chini ya usimamizi wa Mwenyekiti wa bodi ya wakurugenzi (TAWA) Mej. Gen. Hamisi Semfuko na Kamishna wa Uhifadhi (TAWA) Mabula Misungwi kwa namna ambavyo (TAWA) ilivyojitoa kushirikiana na wananchi wa Rufiji na Serikali katika athari za mafuriko.

Kwa upande wake, Mkuu wa Wilaya ya Rufiji, Meja Edward Gowelle ameishukuru TAWA kwa kuwa karibu na wananchi wa Rufiji hata kabla ya athari za mafuriko huku akimtaja Mbunge wa Jimbo hilo ambaye pia ni Waziri wa Nchi ofisi ya Rais TAMISEMI Mohamed Mchengerwa kuwa ndiyo kinara wa ushirikiano huo kati ya Taasisi mbalimbali na wadau wa maendeleo.