Tumieni Vyomba vya Habari kujitangaza-Waziri Mkuu Majaaliwa

Posted on: August 30th, 2018

Waziri Mkuu wa Serikali ya Jamhuri ya Muungano wa Tanzania Mhe. Kassim Majaliwa ameutaka uongozi wa kiwanda cha Biotech Tanzania kinachotengeneza dawa ya kuulia viuadudu   pamoja na bodi ya NDC, kutumia vyombo vya habari katika kuitangaza dawa inayozalishwa katika kiwanda hicho.

Hayo ameyasema  wakati wa ziara yake ya ukaguzi  aliyoifanya  katika kiwanda hicho cha Biotech  kilichopo Mjini Kibaha Mkoani Pwani.

“Katika ukaguzi nilioufanya  bado nimekuta kuna lundo la dawa ambayo  haijapata soko, hivyo nauagiza uongozi wa kiwanda hiki pamoja na bodi ya NDC  kutumia vyombo vya habari kuitangaza dawa inayozalishwa katika kiwanda hiki ili wananchi wajue”alisema mhe. Majaliwa

Akiwa  kiwanda hapo  Mhe. Majaliwa alisema kuwa amefarijika kukuta uwekezaji mkubwa katika kiwanda  hicho ikiwa ni utekelezaji  wa   sera ya Serikali ya awamu ya tano na kuongeza kuwa Serikali imejipanga kuhakikisha inashirikiana na mataifa rafiki ikiwemo Cuba katika kuhakikisha wanawekeza hapa nchini.

Mhe. Majaliwa aliendelea kusema kuwa kiwanda hicho  ni kikubwa Barani Afrika na ujenzi wake ulitokana na mkopo kutoka Serikali ya Cuba.

Aidha ametoa wito  kwa taasisi  mbalimbali na wananchi kufika kiwandani hapo na kununua dawa hiyo  kwa ajili ya kuulia mazalia ya Mbu wakiwemo mbu waenezao ugonjwa wa Malaria .

Katika Hatua nyingine Mhe. Majaliwa ameiagiza Mikoa yote Tanzania Bara  iendelee  na kampeni za kutokomeza malaria kwa kuwahamasisha  wananchi kuweza kununua na kutumia dawa hiyo  ya kuulia viuadudu..

Nae Mkuu wa Mkoa wa Pwani Mhe. Mhandisi Evarist Ndikilo alisema kuwa Mkoa tayari ulishafanya uhamasishaji wa ununuzi  na utumiaji wa dawa kwa jamii ambapo katika  kampeni hiyo wafanyabiashara wa Mkoa wa Pwani walichangia lita 300 ambapo  dawa hizo ziligawanywa kwa wananchi bure siku ya uhamasishaji.