Watakaoficha Sukari na Mafuta Kukiona-RC Ndikilo

Posted on: May 18th, 2018

Mkuu wa Mkoa wa Pwani Mhe. Mhandisi Evarist Ndikilo amewataka wafanyabiashara wote Mkoani Pwani kuacha mara moja tabia ya kuficha bidhaa ili zionekane adimu na waweze kupandisha bei kwa manufaa yao binafsi.

Kauli hiyo ameitoa jana  pindi alipofanya ziara ya kushtukiza katika maghala ya kuhifadhia bidhaa mbalimbali  za wafanyabiashara  waliopo Mailimoja Mjini Kibaha kwa lengo la kuangalia bidhaa za sukari na mafuta ya kula kama zipo ambapo alibaini bidhaa hizo zipo za kutosha .

“Natoa tahadhari kama kutakuwa na mfanyabiashara  yeyote ambae pengine atajaribu kuficha hizi bidhaa  zionekane adimu na zipande bei  kwa  lengo la kijitafutia utajiri wa haraka haraka ajue kwamba atakumbana na mkono wa sheria na ajue kwamba  Serikali ya Mkoa itamchukulia hatua kali sana”alisema Ndikilo.

Aidha Mhandisi Ndikilo amewatoa wasiwasi wananchi wa Mkoa Pwani, kwa kuwahaikikishia kuwa bidhaa ya sukari na Mafuta zipo za kutosha  na suala la kuadimika  na kupanda bei kwa bidhaa hizo halitakuwepo.

Naye mwenyekiti wa jumuia ya wafanyabiashara Mkoa Pwani   Abdalla Ndauka amemuhakikishia Mkuu wa Mkoa mkoa kuwa wao wapo bega kwa kwa bega na Serikali ya Mkoa katika kuhakikisha kuwa bidhaa hizi zitapatikana kwa wingi na pia hawataruhusu suala  kuficha bidhaa hizi.

“Nawahakikishia wananchi wa Mkoa Pwani kuwa  kwa ushirikiano ambao tumekuwa nao kati yetu na Serikali,  nitahakikisha wananchi watapata huduma  kama kawaida na nitahakikisha kwamba suala hili halitaokea na endapo atatokea mwenzetu ndani ya chama  ambae ataenda kinyume na haya basi tutamshughulikia sisi wenyewe kwanza kama chama.

Na nawaomba wafanyabiashara wote wa Mkoa Pwani tuhakikishe kuwa huduma zote za msingi ambazo tulikusudia kuzitoa kwa wananchi basi tuzitoe kwa wakati bila kujali huyu ni nani hasa katika kipindi hiki cha mfungo wa Ramadhani”alisema Ndauka .