Watumishi wakumbushwa kufuata maadili ya Utumishi wa Umma

Posted on: August 23rd, 2018

Watumishi wa ofisi ya Mkuu wa Mkoa wa Pwani  wameaswa kutumia lugha nzuri, katika kutoa huduma kwa Wananchi na  kufanya kazi kwa bidii  bila ya  upendeleo wa aina yeyote.

Rai hiyo ilitolewa leo na Katibu Tawala Mkoa Pwani Bi Theresia Mmbando  wakati wa mkutano wa kazi baina yake  na watumishi wa ofisi  ya Mkuu wa Mkoa Pwani,  ambapo katika mkutano huo pia  alichukua nafasi ya kujitambusha kwa watumishi hao.

Aidha Bi Theresia  aliwataka watumishi wa ofisi hiyo kufanya kazi kwa ushirikiano baina yao na kumpa ushirikiano wa kutosha katika kuwahudumia wananchi  kwa wepesi na weledi.

Pia aliwataka watumishi hao kuwahi kazini ili kuweza kutekeleza majukumu yao ya kazi kwa wakati  na kuwasisitiza kuwa ni lazima kila mtumishi afuate maadili na kanuni za Utumishi wa Umma .

Bi Theresia Mmbando amechukua nafasi ya Ndugu Zuberi Samataba aliyekuwa Katibu Tawala Mkoa Pwani.