Wawekezaji wazidi kumiminika Pwani

Posted on: June 28th, 2018

Serikali Mkoani Pwani imesaini waraka wa makubaliano ya awali ya ushirikiano na jimbo la Fujian la nchini China katika nyanja mbalimbali ikiwemo uchumi,uwekezaji, afya na elimu.

Uwekaji wa saini hiyo  ya makubaliano ya  awali ya ushirikiano huo, umefanyika katika ukumbi mdogo wa mikutano wa Ofisi ya  Mkuu wa Mkoa Pwani baina ya Mhandisi Evarist Ndikilo na makamu mwenyekiti wa Chama Cha Kikomunisti cha China (CCP)kutoka jimbo la Fujian Pan Zheng .

“Kwanza tumesaini makubaliano ya awali ya ushirikiano kati ya Mkoa wa Pwani na Jimbo la Fujian katika Nyanja mbalimbali ikiwemo Viwanda,Elimu,Afya pamoja na kubadilishana uzoefu mbalimbali.Makubaliano hayo ya awali yatawasilishwa kwa serikali ya jimbo la Fujian ambapo itatoa fursa kwa wafanyabiashara kuangalia namna Pwani ilivyojipanga kwenye sekta ya uwekezaji” alisema Mhandisi Ndikilo. .

Aidha  mhandisi Ndikilo alisema kuwa,Mkoa wa Pwani umepata mwaliko wa kwenda kushiriki maonesho yatakayofanyika katika  Jimbo la Fujian ,mwezi Septemba mwaka huu ,ambayo yataurahisishia Mkoa wa Pwani  kutangaza fursa zilizopo Mkoani  humo.

Katika Hatua nyingine   Makamu mwenyekiti  wa Jimbo la Fujian Pan Zheng ameipongeza Serikali ya Mkoa wa Pwani kwa namna ilivyojipanga kuwavutia wawekezaji  na kusema kuwa Mkoa utaendelea kupata wakezaji wengi zaidi kwa sababu ya Fursa  zilizopo Mkoani Pwani ambazo zinawavutia kuwekeza katika maeneo mbalimbali.