Waziri Mkuu awafunda watumishi Pwani

Posted on: November 28th, 2022

Waziri Mkuu Kassim Majaliwa amewataka watumishi wa umma nchini kuwahudumia vyema wananchi bila bughdha ili kuwajengea imani kutokana na serikali yao inavyowajali.

Akizungumza na watumishi wa wa Umma Wilayani Mkuranga Novemba 27, 2022, Mhe. Majaliwa aliwaeleza watumishi hao kuwa wanao wajibu wa kutoa huduma bora na akawaasa kufanya kazi kwa weledi, uamimifu na kujitoa katika kuwahudumia watanzania ambao wanayo imani na serikali yao.

Alisema kuwa Serikali ya awamu ya sita inayoongozwa na Rais Samia Suluhu Hassan imejipanga vizuri kuwahudumia watanzania wote kwa haki na usawa.

Katika hatua nyingine Mhe. Majaliwa amemsimamisha kazi Mfamasia wa halmashauri ya Wilaya ya Mkuranga Edwin Clemence Feruzi na akaiagiza TAKUKURU mkoa wa Pwani kufanya uchunguzi wa tuhuma dhidi ya Mfamasia huyo za kushindwa kutekeleza majukumu yake kwa weledi na kukiuka miiko ya kazi.

Aidha Mheshimiwa Majaliwa pia amemuelekeza Mkuu wa Wilaya ya Mkuranga Bi. Khadija Nasr Ali kuhakikisha kuwa watumishi wanaoishi nje ya wilaya hiyo wawe wameweka makazi yao Wilayani humo hadi kufikia Disemba 30 mwaka huu.