Sitaki kuona Hati chafu au yenye Mashaka Pwani-Samataba

Posted on: July 26th, 2018

Watumishi katika halmashauri za mkoa wa Pwani  wametakiwa kuacha kufanya siasa na  kufanya kazi kwa weledi zaidi huku wakifuata kanuni na sheria za Serikali katika utendaji wa kazi zao.

Rai hiyo imetolewa na Katibu tawala mkoa wa Pwani , Ndugu Zuberi samataba wakati akifunga kikao maalum cha kupitia  hoja   za mkaguzi wa hesabu za Serikali ( CAG) mwanzoni mwa wiki hii wilayani Mafia.

“Ningependa sisi watalaam tufanye kazi zetu za kitaalam  za kushauri kitalaam kulingana na taaluma zetu na kuandaa taarifa  mbalimbali za kazi na  siasa tuwaachie wenzetu wanasiasa ”alisema Samataba

Aidha ameipongeza Halmashauri ya ya Wilaya ya mafia kwa kuweza kupata hati safi na pia amesema amefarijika sana kuona  Halmashauri zote za Mkoa wa Pwani zimepata hati safi.

Samataba amesema kuwa kupata hati safi si jambo dogo  hivyo amezitaka Halmashauri kuwa makini katika kudhibiti matumizi mabaya ya fedha za Serikali na amesisitiza kwamba katika mkoa wake hataki kuona hati chafu. Au yenye mashaka.

Naye Mkaguzi  Mkuu wa Mkoa Pwani ndugu Eliudi Masombolwa  amesema kuwa ukaguzi umefanywa kwa viwango vya kimataifa,   lengo likiwa ni kuona kama kuna ubadhirifu umefanyika na sheria na kanuni za matumizi ya fedha za Serikali  zimezingatiwa.

 Aidha, alisema kupata hati safi hakuimanisha  kwamba hakuna shida katika matumizi ya fedha za Serikali kwa asilimia mia moja(100%)   isipokuwa  Halmashauri imefanikiwa kudhibiti  malengo mabaya yanayoweza kuathiri matumizi  mazuri ya fedha za Serikali.