Hospitali ya Wilaya ya Mafia yapata Mashine mpya ya Mionzi

Posted on: August 13th, 2018

Tatizo la ukosefu wa mashine ya mionzi katika hospitali ya wilaya ya Mafia mkoani Pwani limepatiwa ufumbuzi wa kudumu baada ya serikali kununua  mashine mpya yenye thamani ya milioni miamoja na hamsini kwa ajili ya matumizi ya hospitali hiyo.
Mganga Mkuu wa wilaya ya Mafia daktari Zuberi Mzige amesema ununuzi wa mashine hiyo umesaidia kuondoa tatizo walilokuwa wanalipata wakazi wa wilaya ya Mafia kutumia gharama kubwa ya usafiri wa ndege kusafirisha wagonjwa kwenda jijini Dar es salaam kwa ajili kupatiwa vipimo vya mionzi.

Hayo yamebainika wakati wa  Ziara ya kamati ya siasa ya Chama cha Mapinduzi mkoa wa Pwani walipotembelea  Wilayani ya  Mafia kwa lengo la  kukagua utekelezaji wa ilani ya Chama hicho katika kipindi cha miaka miwili na nusu ya serikali ya awamu ya tano.
Katika ziara hiyo kamati hiyo ilitembelea  hospitali ya wilaya ya Mafia na  kukagua mashine mpya ya mionzi iliyonunuliwa na Serikali kwa lengo la  kuwaondolea adha wakazi wa wilaya hiyo kutumia gharama kubwa kusafirisha wagonjwa kwa njia ya ndege kwenda jijini Dar es salaam kwa ajili ya vipimo vya mionzi.
Akizungumza na kamati hiyo mganga Mkuu wa wilaya ya Mafia daktari Zuberi Mzige amesema ununuzi wa mashine hiyo imekuwa ukombozi kwa wakazi wa visiwa vya Mafia .
Daktari  Zuberi alisema kuwa fedha za ununuzi wa mashine hiyo yenye thamani ya milioni miamoja na hamsini imetolewa na serikali pamoja na ofisi ya mbunge ambapo kati ya fedha  hizo milioni hamsini zimetolewa na halmashauri ya wilaya ya Mafia na shilingi milioni miamoja zimetolewa na mbunge wa jimbo la Mafia Mhe.  Ramadhani Dau. Doktari  Zuberi amesema hayo wakati ziara ya kikazi ya Siku tatu ya kamati ya siasa ya chama cha Mapinduzi mkoa wa Pwani ilipotembelea hospitali utekelezaji wa ilani ya CCM katika kipindi cha miaka miwili na nusu ya serikali ya awamu ya tano.

Akizungumza baada ya kukagua hospitali hiyo mwenyekiti Wa CCM mkoa wa Pwani Mhe. Ramadhani Maneno amesema wameridhishwa na jinsi mkoa huo ulivyotekeleza kwa mafanikio makubwa ilani ya CCM kwa kuboresha upatikanaji Wa huduma za afya  pamoja na kuimarisha miundombinu ya vituo vya afya, ,barabara,,maji na ujenzi wa viwanda.
Kwa upande wake Mkuu wa mkoa wa Pwani Mhandisi Evaristi Ndikilo amesema katika kipindi cha miaka miaka miwili na nusu cha serikali ya awamu ya tano, mkoa  wa Pwani umefanikiwa kutekeleza miradi mbalimbali ambapo katika kipindi hicho zaidi ya vituo saba vya afya  vimepatiwa shilingi milioni 450 kwa  kila kituo kwa ajili ya upanuzi na ukarabati.