Kabeho aipongeza Pwani kwa kusheheni Viwanda

Posted on: July 24th, 2018

Kiongozi  wa mbio za mwenge kitaifa mwaka huu ,Charles Kabeho amemuagiza mtendaji mkuu wa Shirika la Viwango Tanzania (TBS) na watendaji wake kwenda kufanya ukaguzi katika kiwanda cha Kuchi Jogoo kilichopo kata ya Visiga ,Kibaha mkoani Pwani ili kujiridhisha na kutoa kibali cha kuanza kuzalisha unga wa nafaka .
Pia amewataka wahakikishe wanatimiza agizo hilo mwisho July 26 mwaka huu na  apatiwe majibu .
Kabeho aliyasema hayo ,wakati mwenge wa Uhuru ulipokuwa ukikabidhiwa Mkoani Morogoro ukitokea Mkoani Pwani .
Alieleza endapo watachelewa  kufanya hivyo watawajibishwa kwa kuchukuliwa hatua  kali za kisheria.
Aidha alieleza kuwa, wakati alipokwenda kuweka jiwe la msingi kiwandani hapo (july 19) alitoa siku saba kwa shirika hilo liwe tayari litimize agizo hilo .
Kabeho alisema kuwa “,haiwezekani kiwanda kikawa tayari kimekamilisha taratibu za uzalishaji  huku TBS ikawa kikwazo cha kushindwa kwenda kukagua na kutoa kibali cha uzalishaji.
“Mradi huo mkubwa  wenye gharama ya sh. milioni 812.7  ni sehemu ya juhudi za  serikali  za kuhimiza  uwekezaji  ,inapotokea watendaji wa chombo cha  Serikali chenye dhamana ya kuhakikisha lengo la uwekezaji linafanikiwa wanakuwa kikwazo  ni jambo linaloumiza na kusikitisha sana” alisema Kabeho.
Kiongozi huyo wa mbio za mwenge kitaifa  alisema kwamba ,kila mmoja atimize wajibu wake ili kuunga mkono juhudi za serikali pasipo kuweka vizuizi ambavyo vinaashiria  rushwa.
Katika hotuba yake Kabeho alisema kuwa  viwanda vinasaidia kutoa ajira  kwa Wananchi wetu na  kuinua   uchumi na pato la Taifa kwa ujumla .
Aidha aliupongeza mkoa wa Pwani kwa kuweza kutekeleza kwa vitendo sera ya kuifanya Tanzania kuwa Nchi ya viwanda.