Kisarawe sasa yapata Maji ya uhakika

Posted on: May 23rd, 2018

“Mkandarasi atakaesaini mkataba hapa mtuachie sisi serikali ya Mkoa kumfatilia, tunakuahidi tutamfatilia usiku na mchana na yeye afanye kazi zake  usiku na mchana kulingana na mkataba unavyosema ili kuhakikisha wananchi wa Kisarawe wanapata maji safi na Salama”

Kauli hiyo imetolewa na Mkuu wa Mkoa wa Pwani Mhandisi Everist Ndikilo mwanzoni mwa wiki hii wakati akitoa salam zake katika hafla ya uwekaji wa saini mkataba wa ulazaji bomba la maji kutoka Kibamba kwenda Kisarawe .

Mhandisi Ndikilo alisema kuwa ,upatikanaji wa maji katika Wilaya ya Kisarawe utasaidia kufungua fursa nyingi za uwekezaji hasa uwekezaji wa Viwanda na kuchochea uchumi na mji huo.

“Mh. Waziri mimi nauona mji wa Kisarawe ulikuwa umedumaa, lakini upatikanaji wa maji katika mji huu utapelekea mji huu kukua na kutanuka vizuri”alisema Ndikilo.

Aidha Mhandisi Ndikilo alisema kuwa katika Wilaya ya Kisarawe ipo miradi 141 ya maji ya visima virefu na vifupi ambavyo vipo mbioni kukamilika, hivyo kukamilika kwa visima hivi na mradi huo  wa ulazaji wa bomba la maji utasidia upatikanaji wa maji kwa kiasi kikubwa  katika Wilaya ya Kisarawe.

Katika Hatua nyingine Mkuu huyo wa Mkoa amemshukuru Mh Dkt John Pombe Magufuli Rais wa Jamhuri ya muungano wa Tanzania kwa  maelekezo aliyoyatoa  siku ya tarehe 22 Juni 2017 wakati wa uzinduzi wa mradi wa maboresho wa bomba la maji la kutoka Ruvu kwenda Dar es salaam baada ya kumpa taarifa ya ukosefu wa maji   kwa kipindi kirefu katika wilaya ya Kisarawe.

Naye waziri wa nchi Ofisi ya Rais TAMISEMI Mhe. Suleiman Jafo ambaye pia ni Mbunge wa Kisarawe, alisema kuwa mradi wa ulazaji bomba la   maji Kisarawe utasaidi kupatikana kwa maji ya kutosha na utapelekea kukua  kwa  mji wa kisarwe kubadilika na kuwataka wananchi waweze kuulinda na kuuenzi mradi huo.

Mradi huo wa ulazaji wa  bomba la maji kutoka kibamba kwenda Kisarawe umetiwa saini baina ya kampuni ya China Henan  International cooperation group na Serikali ya Jamhuri ya muungano wa Tanzania  unatarajiwa kutekekezwa kwa muda wa miezi 15.Utiaji sahihi huo ulishuhudiwa na waziri wa Maji na Umwagiliaji Mhe. Mhandisi Isack Kamwele na Waziri wa Nchi Ofisi ya Rais Tawala za Mkoa na Serikali za Mitaa(TAMISEMI) Mh. Suleiman Jafo.