Marufuku Kituo kwa cha Afya Pwani Kupata nyota Sifuri-Waziri Jaffo

Posted on: July 10th, 2018

Waziri wa nchi Ofisi ya Rais (TAMISEMI) Mh Suleiman S. Jaffo  amemtaka Mganga Mkuu wa Mkoa  wa Pwani  kuhahikikisha kuwa hakuna kituo  cha Afya katika mkoa huo kinachopata nyota sifuri katika utoaji wa huduma kwa wananchi.

Hayo ameyasema wakati wa uzinduzi wa wodi ya wazazi pamoja na jengo la huduma ya dharura katika hospitali ya wilaya ya Bagamoyo, Majengo hayo yamejengwa kwa ufadhili wa taasisi ya Dhinureyin Islamic Foundation iliyoko Mkoani Iringa.

Aidha amesisitiza juu ya utoaji wa huduma bora za Afya katika vituo vyote vya afya Mkoani Pwani na kuongeza kuwa hakuna sababu ya kituo chochote cha Afya nchini kushindwa kutoa huduma bora kwa wananchi.

Katika Hatua nyingine Waziri Jaffo ameipongeza taasisi hiyo ya dini ya Dhi Nureyin kwa kuweza kujenga majengo hayo ya kisasa ambayo ni muhimu katika kutoa huduma ya Afya kwa jamii katika Mkoa wa Pwani.

 Pia amempongeza Mkuu wa Wilaya ya Bagamoyo Alhaj. Majid Hemed Mwanga  kwa kuweza kufuatilia ufadhili na ujenzi huo kwa karibu zaidi hadi kufanikisha kupata majengo hayo.

Nae Mkuu wa Mkoa wa Pwani Mhe.Mhandisi Evarist Ndikilo amesema kuwa kupatikana kwa majengo hayo ni ukombozi kwa wananchi wa wilaya ya Bagamoyo na Mkoa wa Pwani  kwa ujumla kwani kumekuwa na ongezeko la msongamano wa wagonjwa  wanaohitaji huduma ya dharura katika hospitali nyingi za Mkoa wa Pwani.

Mhandisi Ndikilo aliwataka wananchi pamoja na wadau mbalimbali wa Afya nchini  kuiga mfano wa taasisi ya DhiNureyin kwa kushirikiana na Serikali katika kuboresha huduma za Afya.

Aidha Mwenyekiti wa Taasisi ya Dhi Nureyin Sheikh Said Abry amesema kuwa majengo hayo mawili yamegharimu kiasi cha shilingi millioni 703 za Tanzania na amesema   mbali na ujenzi huo pia wamefadhili vifaa tiba vyote vitakavyowekwa ndani ya majengo hayo.

 Sheikh Abry ameongeza kuwa taasisi hiyo itaendelea kushirikiana na Serikali katika kusaidia kuboresha sekta mbalimbali katika maeneo yote Nchini .