Nataka kuona Hati safi kwa Mwaka ujao-Ndikilo

Posted on: August 3rd, 2018

Halmashauri zote Mkoani Pwani zimetakiwa kuhakikisha kuwa zinajibu hoja zote kwa wakati na kuhakikisha kuwa zinafungwa kwa wakati

Rai hiyo imetolewa na Mkuu wa Mkoa Pwani Mhe. Mhandisi Evarist Ndikillo, wakati wa kikao maalum cha baraza la  madiwani  cha kujadili hoja za mkaguzi  wa Hesabu za Serikali CAG Wilayani Rufiji.

Mhandisi Ndikilo alisema kuwa maelekezo ya Serikali ni pamoja   na kuzitaka halmasahuri zote kuzijibu hoja kwa wakati na kuhakikisha kuwa hoja hizo zinafungwa.

Aidha amezipongeza halmasahuri zote za Mkoa Pwani kwa namna walivyofanya kazi ya kusimamia matumizi mazuri ya  fedha  za Serikali kitu kilichoziwezesha kupata hati safi.

Alisema kuwa  kupata hati safi sio kazi ndogo kwani inahitaji   kufanyakazi  vizuri  pamoja na  kuheshimu fedha za serikali, amewataka wasibweteke bali waendelee kufanyakazi kwa  weledi na kuzingatia taratibu   kwani kwa mwaka anataka kuona hati safi tena.

Pia amezitaka Halmashauri hizo kuainisha vyanzo vyote  halisi vya mapato na kusisitiza kuwa visimamiwe ili viweze kukusanya mapato  vizuri

Mhandisi Ndikilo alisisitiza kuwa hatokuwa tayari kumfumbia macho mtendaji yeyote Yule ambaye atafanya uzembe  na kuisababishia Hasara Halmashauri.

Pia aliwataka  wakurugenzi waiimarishe kitengo cha ukaguzi katika Halmashauri zao na kuwataka wakaguzi wote wa ndani kuwa makini  katika  kufanyakazi za kuzisimamia Halmashauri kutumia vyema fedha za serikali na amewataka kufanyakazi kwa weledi pasipo kumuogopa mtu.

Katika hatua nyingine Mhandisi Ndikilo ameipongeza Ofisi ya Mkaguzi mkuu wa Hesabu za Serikali Mkoa Pwani kwa namna walivyofanya ukaguzi  kwa kufuata sheria na taratibu za ukaguzi.