Ndikillo aitaka TBS kutoa elimu kwa wenye viwanda ili kuondoa tatizo la uzalishaji wa bidhaa zisizo na ubora

Posted on: June 22nd, 2018

Wamiliki wa Viwanda Mkoani Pwani waaswa kuzalisha bidhaa kwa kutumia  vipimo vinavyostahiki ili  kuzalisha bidhaa bora  zenye viwango na kuleta ushindani kwenye masoko ya ndani na nje ya Tanzania.

Rai hiyo imetolewa na Mkuu wa Mkoa wa Pwani  Mhandisi Evarist Ndikilo  wakati akifungua semina iliyoambatana na maadhimisho ya siku ya vipimo Duniani .

Mhandisi Ndikilo amesema kuwa, Serikali kupitia taasisi zenye dhamana ya kushughulika na vipimo wamejipanga kuhakikisha kila  mfanyabiashara anayezalisha bidhaa yake nchini  atumie vipimo sahihi kwa ajili ya kupata ubora kwa matumizi ya wananchi.

“Vipimo ni kiungo muhimu sana  kwa maendeleo ya viwanda ,biashara,Afya,ujenzi , Elimu na taasisi za kiutafiti wa kisayansi” alisema Ndikilo.

Aidha, Mhandisi Ndikilo amesema kwamba kutokana na utitiri wa viwanda uliopo Mkoani hapa ,amelitaka shirika la Viwango liendelee kutoa elimu kwa wenye viwanda ili kuondoa tatizo la kuzalisha bidhaa zisizo na ubora .

Naye Kaimu Mkurugenzi wa Upimaji wa Ugezi (Meterology) kutoka shirika la Viwango Tanzania (TBS) Mary Meela amesema ,wenye Viwanda Mkoani Pwani bado havijachangamkia masuala ya ugezi ndio sababu shirika kupitia maabara ya ugezi imeamua kufunga safari kufanya maadhimisho Mkoani Hapa.

Maadhimisho ya Siku ya Vipimo duniani mwaka huu yameadhimishwa June 22  ambapo  yameambatana na kauli mbiu isemayo “Muendelezo wa mabadiliko ya vizio vya Kimataifa”.