Ndikillo asisitiza kudumisha amani Kibiti kwenye Siro Cup

Posted on: May 20th, 2018

Timu ya soka ya Mgomba ya wilayani Rufiji imetwaa ubingwa wa Siro Super Cup 2018 kwa kuifunga Mjawa ya wilaya ya Kibiti kwa penati 11-10.

Mchezo huo ulichezwa mwishoni mwa wiki hii katika uwanja wa Samora  uliopo Wilayani Kibiti ambapo mgeni rasmi alikuwa ni Mkuu wa Mkoa wa Pwani Mhe.  Mhandisi Evarist Ndikilo.

Timu hizo hadi zinamaliza muda wa kawaida wa dakika 90 zilishindwa kufungana na kufanya matokeo kuwa 0-0 ndipo zikaingia hatua ya penati  ambapo Mgomba walipata penati zote 11 na Mjawa  waliokuwa wenyeji wakipata penati 10 na kukosa moja.

Kutokana na ushindi huo Mgomba walifanikiwa  kujinyakulia kiasi cha fedha taslim shilingi 1,000,000/=,kombe,seti ya jezi na medali ya dhahabu  huku Mjawa wakijinyakulia kiasi cha shilingi 500,000/= seti ya jezi na medali  fedha na mshindi wa tatu timu ya Mipeko kutoka wilaya ya Mkuranga wakijinyakulia 300,000/=.

Mfungaji bora Dickson Mhilu alijinyakulia mpira huku mwamuzi bora akijinyakulia jezi kwenye mashindano hayo yaliyokuwa na kauli mbiu ya Kibiti salama Jamii salama.

Akifungua Mashindano hayo ,Mkuu wa Mkoa wa Pwani Mhandisi Evarist Ndikilo  amepongeza kiwango kizuri kilichoonyeshwa na timu zote mbili  katika mchezo huo  na ametoa rai kwa wadau wa soka kufika vijijini kuvumbua vipaji  vya wanamichezo  badala ya kuangalia mijini pekee.

Katika hatua nyingine Mhandisi Ndikilo amewaasa wakazi wa Kibiti na Rufiji kudumisha  amani  iliyopo  kwa sasa kwani pasingekuwa na amani kwenye maeneo hayo basi hata michezo hiyo isingeweza kufanyika .

 “Mnapofurahia kushiriki katika  michezo hii mkumbuke kuwa furaha yetu itaendelea kudumu kama mtatambua kuwa usalama ndio unaotufanya tuwepo hapa,bila usalama ndugu zangu tusingeweza kuwa hapa leo  tungekuwa kila mmoja  amekaa kwenye eneo lake kwa kuhofia usalama .

Adui yetu mkubwa ni  uhalifu wa aina yoyote, ni matumaini yangu  kuwa hivi sasa kila mmoja wetu anaelewa vya kutosha juu ya  madhara ya uhalifu, ni wajibu wangu kama kiongozi na mwenyekiti wa kamati ya ulinzi na usalama  kuwakumbusha juu ya hatari inayoweza kuwakuta tena endapo hamtachukua hatua madhubuti za kuzuia na kutokomeza  aina zote za uhalifu.Nawaasa kila mmoja katika nafasi  yake kushiriki katika shughuli za ulinzi na usalama kwa kutoa taarifa  za uhalifu kwa vyombo vya ulinzi na usalama”alisema Ndikilo.

Aidha alisema kuwa mashindano hayo yamedumisha upendo na kuondoa tofauti baina ya wakaazi wa Wilaya tatu za Kibiti,Mkuranga na Rufiji kwa kushiriki katika mashindano hayo kwa mshikamano wa hali ya juu.

Mashindano hayo ambayo yalianza mwezi Aprili yaliandaliwa na Mkuu wa Jeshi la Polisi Nchini Inspekta Jenerali (IGP) Simon Siro na kushirikisha kata 54 za wilaya hizo za kanda Maalumu ya Mkoa wa Kipolisi wa Rufiji.