RC Kunenge amshukuru Rais Samia kwa jitihada za kuboresha huduma za Afya

Posted on: September 18th, 2024

Mkuu wa Mkoa wa Pwani, Mhe. Abubakar Kunenge, ametoa shukrani zake kwa Rais wa Jamhuri ya Muungano wa Tanzania, Dkt. Samia Suluhu Hassan, kwa juhudi zake za kushirikiana na mataifa mbalimbali katika kutatua changamoto za afya nchini.

Kunenge aliyasema hayo leo wakati wa ziara ya Princess Sophia, mke wa mtoto wa Malkia wa Uingereza, alipotembelea mkoa wa Pwani kukagua maendeleo ya Mradi wa Macho. Mradi huu ni matokeo ya ushirikiano kati ya Serikali ya Tanzania na Uingereza katika kupambana na ugonjwa wa macho uitwao Trakoma.

"Namshukuru sana Rais Dkt. Samia Suluhu Hassan kwa juhudi zake za kuleta mgeni huyu muhimu, ambaye amesaidia sana katika kuboresha huduma za afya," alisema Kunenge.

Katika ziara hiyo, Princess Sophia alitembelea Kituo cha Afya cha Mlandizi na kumtembelea Bibi Hadija Shabani, mkazi wa Kijiji cha Vikuruti, Wilaya ya Kibaha Vijijini. Bibi Hadija alikuwa muathirika wa ugonjwa wa Trakoma, lakini sasa amepona baada ya kufanyiwa upasuaji katika Kituo cha Afya cha Mlandizi, ambako mradi huo wa macho umeanzishwa.

Serikali ya Tanzania, kwa kushirikiana na Serikali ya Uingereza, imefanikiwa kutoa msaada wa vifaa tiba, dawa, malipo ya mishahara ya madaktari, na kujenga chumba cha upasuaji cha kisasa katika Kituo cha Afya cha Mlandizi, Mkoa wa Pwani.

Kwa upande wake, Princess Sophia amepongeza jitihada za Serikali ya Tanzania na Uingereza katika kutokomeza ugonjwa wa Trakoma, na amewashukuru wahudumu wa afya kwa kazi kubwa waliyoifanya katika kuhudumia wananchi.

"Tunaishukuru Serikali ya Tanzania na Uingereza pamoja na wahudumu wa afya kwa huduma bora. Naamini, kwa jitihada hizi, tutafanikiwa kutokomeza kabisa ugonjwa wa Trakoma," alisema Princess Sophia.

Naye Waziri wa Afya, Jenista Mhagama, amewahimiza viongozi wa vijiji na vitongoji kuwahamasisha wananchi kujitokeza kwa wingi kupata huduma za matibabu pindi wanapoona dalili za ugonjwa wa Trakoma, kwani kuchelewa kutibiwa kunaweza kusababisha upofu.

Aidha, alimtaka Bibi Hadija, ambaye amepona baada ya kufanyiwa upasuaji, kuwa mfano wa kuigwa kwa kuhamasisha watu wengine wanaosumbuliwa na ugonjwa huo kupata matibabu mapema.