RC Ndikilo awajia juu watendaji Bagamoyo kwa kushindwa kutatua kero za wananchi.

Posted on: August 13th, 2020

Mkuu wa mkoa wa Pwani mhandisi Evarist Ndikilo ,amewajia juu maafisa tarafa ,watendaji wa vijiji na kata ,wilayani Bagamoyo kuhakikisha wanatimiza wajibu wao wa kazi na kutatua kero za wananchi ikiwemo migogoro ya ardhi ,ndani ya mwezi mmoja kabla hajachukua maamuzi mazito dhidi yao .

Aidha ameeleza ,wilaya hiyo imehemewa na migogoro ya ardhi hali inayosababisha baadhi ya wananchi badala ya kukimbizana na maendeleo wanakimbizana na mashauri ya migogoro hiyo katika mabaraza ya ardhi na mahakamani .

Akizungumza katika ziara yake aliyoianza mkoani Pwani ,kusikiliza kero za wananchi ,akianzia Bagamoyo ,Ndikilo ameshtushwa kupokea malalamiko mbalimbali 88 ambayo mengi yapo ndani ya uwezo wa kutatuliwa ngazi ya chini.

Ndikilo alielezea ,mabaraza ya ardhi kata pia hayafanyi kazi kiufanisi na ni chanzo cha migogoro hali inayosababisha baraza la ardhi Kibaha kuhemewa na mashauri .

"Hii inaashiria watendaji wa chini hawawajibiki ,naweza kuandika mapendekezo muondoke wote na nawapa salamu msipokaa sawa mtaondoka"

Hata hivyo Ndikilo alibainisha ,idara ya ardhi ofisi ya mkurugenzi wa halmashauri ya wilaya ya Bagamoyo wasichelewe kufanya maamuzi ya mashauri ya wananchi kwani inasababisha kero .

"Mchukue hatua haraka kulingana na mashauri yao ,malizeni kwa muda mfupi ,"; Wananchi wanataka haki zao ,teteeni wanyonge kama hana haki ijulikane kuliko kuzungushwa :" alisisitiza Ndikilo .

Pamoja na hilo ,mkuu huyo wa mkoa alivitaka vyombo vya dola kushughulikia vikundi vya kiuhalifu vinavyolalamikiwa na wauzaji ardhi wanaotumia mabavu ili kulinda raia na mali zao .

Nae mkuu wa wilaya ya Bagamoyo ,Zainab Kawawa alisema ,kila mtendaji atimize wajibu wake badala ya kusubiri viongozi wa juu wafikishiwe malalamiko ambayo wangeweza kuyatatua .

Alieleza kero zinazohusu kushughulikiwa na ofisi ya mkuu wa wilaya atazifanyia kazi na zipo ambazo kishaanza kuzishughulikia .

Kwa upande wa wananchi akiwemo Swaiba ,mzee Hussein Mfaume ,Asha Mwambala na Amina Ramadhani wameshukuru ziara hiyo kufanyika kwani wametoa kiu yao .

Bi Asha Mwambala alielezea kwamba ,anakabiliwa na mgogoro wa ardhi miaka mingi sasa na tatizo lipo katika kuchelewesha mashauri wanayoyapeleka.

Aliomba kero za migogoro ya ardhi zitatuliwe ili kurejesha amani kwa wananchi .