RC Ndikilo awataka Wananchi wa Pwani kushirikiana na vyombo vya Ulinzi na Usalama kwa utoa taarifa zenye tija.

Posted on: February 9th, 2019

Mkuu wa Mkoa wa Pwani Mheshimiwa Mhandisi Evarist Ndikilo amewataka wananchi Mkoani hapa kuacha mara moja tabia ya kuhifadhi  wahamiaji haramu, na yeyote atakayebainika kufanya hivyo atachukuliwa hatua kali za kisheria.

Hayo  ameyasema wakati alipofanya mkutano na Waandishi wa habari baada ya kukamatwa kwa wahamiaji haramu 12 , Waethiophia 11  na msomali 1 pamoja na watanzania wawili ambao ni wasafirishaji .

Mhandisi Ndikilo amesema kuwa, wahamiaji hao walikamatwa baada ya Idara  ya Uhamiaji Mkoani hapa  kupata  taarifa ya kintelejensia kutoka kwa raia mwema juu ya uwepo wa raia hao wa kigeni wakiwa wamejificha katika mapori ya ruvu darajani , ambapo Ofisi ya Uhamiaji  ya Mkoa ilifanya msako kwa kushirikiana na vyombo vya ulinzi na usalama  na kufanikiwa kuwatia mbaroni raia wahamiaji haramu hao 12  wakiwa wamejificha katika pori hilo.

“Natoa rai kwa wananchi wa Mkoa wa Pwani kutoa ushirikiano kwa vyombo vya ulinzi na usalama kwa kutupatia taarifa zenye tija, pale wanapowaona watu wasiowafahamu kwenye maeneo yao ili vyombo vyetu vya ulinzi na usalama viweze kuchukua hatua haraka  “alisema Mhandisi Ndikilo.

Katika hatua nyingine Mhandisi  Ndikilo ameviagiza  vyombo  vya ulinzi na usalama Mkoani hapa,  kudhibiti maeneo yote ambayo yamekuwa yakitumiwa na wahamiaji haramu kuingia ndani ya Mkoa wa Pwani na kuhakikisha wanadhibiti mtandao wa usafirishaji wa wahamiaji  hao majini na nchi kavu.