RC Ndikilo wataka maDC,TRA kushirikiana Ugawaji Vitambulisho vya wamachinga

Posted on: January 31st, 2019

Mkuu wa Mkoa wa Pwani Mhandisi Evarist Ndikilo   amekabidhi jumlaya  vitambulisho 35,000 vya wafanyabiashara  Ndogondogo (wamachinga) kwa Wakuu wa Wilaya zote  za Mkoa wa Pwani kwa awamu ya pili.

Akikabidhi vitambulisho hivyo mwishoni  mwa wiki hii,  Mhandisi Ndikilo  amewataka  Wakuu hao wa Wilaya kulisimamia vizuri  zoezi hilo la  ugawaji  wa Vitambulisho  kwa kushirikiana na Mamlaka ya Mapato Tanzania TRA, na kuhakikisha  vinagawiwa kwa wafanya biashara ndogondogo wote  katika Mkoa wa Pwani.

Pia amewataka kuwasimamia vizuri watendaji wa Halmashauri ili waweze kulitekeleza zoezi hili la ugawaji wa vitambulisho hivyo kwa busara kubwa.

Aidha alisema kuwa ,kila Halmashauri ihakikishe inagawa vitambusho hivyo kwa wafanyabiashara wote na kusisitiza kuwa kila mfanyabiashara lazima awe na kitambulisho na hataruhusiwa kufanya biashara ya aina yeyote kama hatakuwa na kitambulisho hicho..

“Yeyote Yule anayefanya biashara na halipi kodi TRA  wala hana mashine ya EFD basi huyo anapaswa kupewa kitambulisho hicho”Alisema Mhandisi Ndikilo.

Mkoa wa Pwani umepokea jumla ya vitambulisho 60,000 kwa awamu zote  mbili,ikiwa  ile ya kwanza Mkoa ulipokea vitambulisho 25,000, na awamu ya pili mkoa umepokea vitambulisho 35,000 ambapo vyote vimegawiwa katika Halmashauri zote tisa ambapo kila mfanyabiashara anayepaswa kupewa kitambulisho hicho atatakiwa kulipa elfu ishirini.