Serikali yazidi kuboresha Huduma za Afya Pwani.

Posted on: August 13th, 2018

Serikali imeanza ujenzi wa kituo  cha afya katika kata ya Kirongwe wilaya ya Mafia mkoani Pwani ili kuwaondolea wakazi wa kata hiyo adha ya kutembea zaidi kilometa nane kwenda kufuata matibabu katika hospitali ya Wilaya.
Akizungumza na kamati ya siasa ya chama cha Mapinduzi ya mkoa Pwani, Mkuu wa Wilaya ya Mafia  Mhe. Shaibu Nunduma amesema kituo hicho kinajengwa na serikali kwa kushirikiana na wadau mbalimbali ambapo katika awamu ya kwanza tayari serikali imetoa shilingi milioni 500  kwa ajili ya ujenzi wa jengo la wagonjwa wa nje (OPD), wodi ya wazazi, chumba cha upasuaji, jengo la wagonjwa wa ndani na nyumba za madaktari.
Naye mganga Mkuu wa Wilaya ya Mafia dokta Zuberi Mzige amesema ujenzi wa kituo hicho utakapokamilika kitahudumia wananchi wa kata za Kanga, Kirongwe, Baleni na Ndagoni zenye vijiji 13 .
Mhe. Nunduma aliongeza kuwa  kukamilika kwa mradi huo pia kutapunguza idadi ya vifo vya akinamama wajawazito ambao walikuwa wakipoteza maisha wakati wa kusafirishwa kwenda kujifungulia katika hopitali ya wilaya.  

Aidha aliongeza kuwa katika kipindi cha miaka miwili na nusu takwimu zilionesha kuwa  akinama wajawazito tisa (9) walifariki dunia wakiwa njiani wakipelekwa hospitali  ya Wilaya kujifungua.
Akizungumza Mara baada kutembelea ujenzi huo mwenyekiti CCM Mkoa wa Pwani Mhe. Ramadhani Maneno ameipongeza serikali  kwa kujenga kituo hicho na kuitaka iharakishe kukamilisha ujenzi huo ili  huduma zianze kutolewa mapema.
Kwa upande wake Mkuu wa mkoa wa Pwani Mhandisi Evaristi Ndikilo ameiagiza Halmashauri hiyo ya Wilaya ya Mafia kuhakikisha inakamilisha mradi huo kabla ya mwezi Desemba mwaka huu kama ilivyokusudiwa.