Wakazi wa Kisarawe walilia Kituo Kipya cha Mabasi

Posted on: February 12th, 2019

Wakazi wa Wilaya ya Kisarawe Mkoani Pwani wameiomba Halmashauri ya Wilaya hiyo kukamilisha ujenzi wa kituo kipya cha mabasi kinachojengwa na Serikali kwa lengo mahususi la kuvutia Mji wa Kisarawe, kukua kibiashara na kiuchumi.

Hayo wameyasema wakati Mkuu wa Mkoa wa Pwani  Mhe.  Mhandisi Evarist Ndikilo alipofanya ziara ya ukaguzi wa Miradi ya maendeleo Wilayani humo , na kukagua barabara ya Chole , Vikumburu pamoja na ujenzi wa kituo hicho.

Aidha Diwani wa kata ya Kisarawe Abel  Mudo amesema kuwa, kukwama kwa kituo hicho kunasababisha adha kwa abiria wanaotumia kituo hicho kusafiri kwani kilichopo ni kidogo na hakina paa la kuzuia abiria kunyeshewa na mvua na pia kudumaza ukuaji wa Mji huo.

Kwa upande wake mkurugenzi  wa Halmashauri ya Wilaya hiyo Musa Gama amesema  ujenzi wa kituo hicho unagharimu  jumla ya shilingi milioni 219 lakini mpaka sasa mradi  unasuasua  kutokana na ukosefu wa fedha.

Akizungumza mara baada ya kukagua kituo hicho Mkuu wa Mkoa  wa Pwani Mhe. Mhandisin Evarist Ndikilo ameiagiza Halmashauri hiyo kukamilisha haraka mradi huo ili uweze kuwasaidia wananchi kama Serikali inavyokusudia.

Aidha Mhandisi Ndikilo amewapongeza wakala  wa Barabara Mijini na Vijijni TARURA  kwa kuweza kuunganisha mtandao wa barabara Wilayani humo.

“Napenda kuwapokeza TARURA kwa kweli  kazi  mmeifanya , kwani ni kipindi kifupi sana tokea muanzishwe lakini mmefanya mambo makubwa sana kwani miundo mbinu ya barabara inaridhisha na inaendanana na thamani ya Fedha kweli mnahitaji  pongezi “ alisema  Mhandisi Ndikilo.