Wakulima wa Mijini Waaswa Kuchangamkia Teknolojia ya Kisasa ili Kuongeza Tija.

Posted on: August 7th, 2025

Katibu Tawala wa Mkoa wa Pwani, Pili Mnyema, ametoa wito kwa wakulima wa maeneo ya mijini kutumia teknolojia ya kisasa katika kilimo na ufugaji ili kuongeza uzalishaji na kipato chao.

Wito huo ameutoa leo Agosti 7,2025 wakati wa Maonesho ya Nanenane, katika Banda la Halmashauri ya Manispaa ya Kibaha.

Mnyema aliwahimiza wakulima wa mjini kutumia mbinu bora na za kisasa, ikiwemo matumizi ya nyavu kwa mazao yanayotambaa na ufugaji wa kisasa unaozingatia nafasi ndogo zilizopo mijini.

“Tunaamini kuwa kilimo cha mjini ni mkombozi mkubwa wa kipato kwa wananchi. Ni muhimu kutumia teknolojia na maarifa ya kisasa ili kuzalisha zaidi kwa tija hata katika maeneo madogo,” alisema Bi. Mnyema.

Aidha, aliipongeza Halmashauri ya Manispaa ya Kibaha kwa jitihada zake katika kuhamasisha matumizi ya teknolojia kwenye sekta ya kilimo na ufugaji, akibainisha kuwa juhudi hizo zinapaswa kuungwa mkono na wadau wote wa kilimo cha mjini.

Alisisitiza  umuhimu wa wakulima na wafugaji kufuata ushauri na maelekezo ya wataalamu wa kilimo (maafisa ugani), ili kuimarisha uzalishaji na kusaidia kuhakikisha usalama wa chakula katika miji.

“Maendeleo ya kilimo mijini yanategemea kwa kiasi kikubwa ushirikiano wa wananchi na wataalamu. Tufuate ushauri ili tufanikiwe,” aliongeza.